無論你打算買定係已經買咗電動車，都會接觸到好多數字，所以我哋先睇下佢哋嘅意思：
首先，記住呢個唔係最正確嘅formula講法：Volt x Amp = Watt
電池容量單位kWh：籠統地講，數值越大，電池容量越大，續航距離就越長。例如早期嘅日產Leaf，電池容量值24kWh，去到目前電池容量最大嘅Tesla Model S P100D，有100kWh，足足四倍有多！
同手提電腦或者電話唔同，電動車嘅電池管理系統 (BMS) 係唔會用盡晒全舊電嘅容量，一般預留5-10%以延長電池嘅壽命，所以Leaf嘅實際可用容量其實得22.6kWh，Model S P100D就有95kWh，比較保守嘅有Audi e-tron，標示容量為95kWh但實際可用嘅估計得83kWh，「實用面積」得8成7。
有留意開寶馬電動車嘅話，你會發現佢唯一嘅「異類」，唔用kWh而係用Ah嚟標示，但係用返上面VxA=W嘅計算方法（或者懶啲，Google search返），就知道最早期嘅i3 60Ah電池就等於22kWh，94Ah等於33kWh，最新嘅120Ah就有42.2kWh。
了解咗電池容量之後，你或者會問：噉Model S P100D嘅續航距離係咪長過前期Leaf四倍幾呢？
同一道理，車嘅大細、輕重、風阻（係咪流線型）以至引擎嘅設計都會令到一樣係1500cc車嘅「Toyota四門房車Corolla」同「Honda七人車Stepwgn」耗油量差距多達20%。
所以，下一篇會介紹下電動車嘅「耗電效能」。
