揸電動車，除咗環保零排放，最大誘因當然係接近唔使錢嘅電費。
為咗推廣電動車使用，好多公私營機構都會提供折扣甚至免費叉電同泊車，真正「又食又拎」。
- 中電同港燈各自提供嘅各種充電站，無需申請，使用都係完全免費，過去幾年都係話優惠到年底，然後新一年又延續落去，當然希望呢項德政可以keep住（仲最好提供多啲充電站）。
- 廿幾個設有充電站嘅房委會停車場，會有埋一至兩個鐘嘅免費泊車優惠，同樣都係唔洗申請，叉完電之前去管理處拍咭核實就得 (優惠於2022年1月1日終止，充電仍然免費但取消免泊優惠)。
- 第二多嘅停車場優惠就數到領展旗下13個停車場，雖然唔係完全免費，但只要任何消費（去便利店買支水都得），就有三小時豁免。不過留意返要以牌簿同八達通預先申請，有時段限制，每日只可豁免一次。
- 雖然唔係完全免費，但論停車場數量，信和集團嘅8折優惠以27個取勝，當中亦多屬旺區。同樣地要預先填表申請批核，不過冇成本、又有着數，點解唔申請？
