揸車入咗十幾廿年油，好自然會用返同一思路去諗叉電呢件事：覺得就算嚟緊嘅Tesla Model 3配合Supercharger V3，5分鐘叉到120公里（對比起而家中電港燈嘅「50kW快速充電站」25-30分鐘先得100公里已經快咗7倍！）都仲麻煩過入油太多。
實情係，撇除科技一路進步，入油同叉電真係完全兩個唔同嘅概念。新型屋苑、商廈、科學園都有大量嘅叉電位，你大可以安心泊好、插電、返工或瞓覺，然後再拎車嘅時候已經有足夠嘅電量，呢方面去睇可以調轉講，揸電車的話連去油站同排隊嘅時間都慳返。
當然，香港大部分人都唔係住村屋有車位拉到電，住樓或者商廈嘅就算有充電位都係三兩個，除咗叉電本身嘅時間，旺區兼繁忙時間的話，由揸車到叉好電，兩三個鐘頭真係閒事（當年嘅科學園Supercharger有5-6架車排隊算係少人等）。
所以喺2019年呢刻，充電站仲需要大量擴張嘅時候，考慮買電動車應該遇到以下幾個情況：
即刻買！唔好諗！
· 私人固定泊位：車位可以拉16A或以上嘅電（業主委員會、物業管理處、 大廈本身電量限制 、保險責任、安裝成本等都要解決），即係每晚8個鐘頭可以叉到100-180公里，足夠每日行程有餘。
· 私人固定泊位：已經有插蘇位。係，就算得個13A三腳插，8個鐘頭到可以叉到60-120公里，真係要新界環島遊兼赤柱來回機場，咪中途搵個快叉補一補囉，你揸咁耐都要屙個尿食個包啦。
Check清楚，安心買：
· 公共停車場：例如科學園三期、部份政府屋苑同政府多層停車場，都有十個以上嘅充電位，可以安心泊過夜。當然最好每晚落去視察下，有幾多叉緊電嘅車同幾多「生人霸死地」嘅汽油車。
· Tesla適用 – 純靠Supercharger：Tesla其中一個屈機嘅地方，就係專用嘅充電網絡，好多新嘅SC場閑閑地都有10個8個充電位，九龍灣富通中心更加有12個SC，視乎閣下嘅工作同作息時間，如果工作或者住得近呢啲點，食個飯或者買完餸就輕鬆叉完。
是但啦算數啦唔煩你啦：
· 泊車唔定點唔定時、作息唔定時、返工唔定點唔定時嘅你，真心唔建議你買電動車住，過多幾年電動車續航遠多，叉電快啲，網絡覆蓋又多啲先諗都唔遲。
